2026 жылдың бірінші тоқсаны Қазақстан экономикасы үшін шынайы сынақ кезеңі болды. Мұнай өндірудің 19,8%-ға төмендеуі өнеркәсіпке де, әсіресе мұнайлы өңірлерге де айтарлықтай қысым түсірді. Соған қарамастан, жалпы ішкі өнім 3%-ға өсім көрсетті. Бұл — экономиканың бұрынғыдай бір ғана секторға тәуелді емес екенін білдіреді.
Өсім бірнеше бағыттың есебінен қалыптасты. Атап айтқанда, құрылыс саласы 114,8%-ға жетіп, ең жоғары динамиканы көрсетті. Көлік және қоймалау 112,8%, сауда 104,8%, ауыл шаруашылығы 103,4%, ал байланыс секторы 103,9% деңгейінде өсім берді. Әсіресе көлік саласындағы жағдай назар аударарлық: құбыр арқылы тасымалдау 98,5%-ға дейін төмендегеніне қарамастан, жалпы сектор өсімді сақтап қалды. Бұл экономика тек салалар арасында ғана емес, сала ішінде де әртараптану жүріп жатқанын көрсетеді.
Құрылыс саласының барлық дерлік өңірде тұрақты өсуі инвестициялық белсенділіктің жалғасып жатқанын және инфрақұрылымдық жобалардың жүзеге асырылып жатқанын айғақтайды.
Қорытындылай келе, мұнай факторы әлі де маңызды болғанымен, ол экономиканың жалпы бағытын толық айқындай алмайды. Қазақстан экономикасы біртіндеп дербес, көпсалалы жүйе ретінде қалыптасып келеді.
