Құрметті Түркістан облысының тұрғындары!
Ардақты ағайын!
Баршаңызды Әз-Наурыздың бастауы – Амал күнімен шын жүректен құттықтаймын!
Амал – тек мереке ғана емес, халқымыздың бірлігін, бауырмалдығын, кең пейілін көрсететін дәстүр. Қыстан аман шыққан қауым осы күні бір-бірімен жолығып, амандық сұрасып жыл басымен құттықтаған. Бұл – ағайын мен туысты, дос-жаранды бір-бірімен табыстырып, өкпе-ренішті ұмытып, татулық пен сыйластықты нығайтатын ерекше күн.
Берекелі Түркістан өңірінде де бұл күннің мән-маңызы артып келеді. Ағайынның арасы жақындап, үлкенге құрмет, кішіге ізет көрсетіліп, ұлттық құндылықтарымыз жаңғыра түседі. Осындай дәстүрлеріміз ел бірлігін нығайтып, ұрпақтар сабақтастығын жалғастыра береді.
Жыл басынан ақжолтай хабар беретір мерейлі күні әр шаңыраққа амандық, бақ-береке, молшылық тілеймін. Әр отбасында қуаныш пен шаттық орнап, елімізде бірлік пен тұрақтылық нығая берсін.
Көрісу күні құтты болсын!
Ізгі ниетпен!
Нұралхан КӨШЕРОВ,
Түркістан облысының әкімі.
